Қарабұлақ, Жетісу губерниясы, Қырғызстан 1924-2015 Алматы, Қазақстан

(1924, Қарабұлақ – 2015, Алматы) Қазақ акварель мектебінің негізін қалаушы Үкі Әжиев акварельмен қатар, сия мен қарындашты да шебер қолданған. Оның шығармаларында сызықтардың нақтылығы мен бөлшектердің күрделілігі үйлесім тапқан. Ол жарық пен кеңістікті, уақыттың өтпелі табиғатын бейнелеуге ұмтылды, қозғалыс арқылы бір сәттік, жалт еткен мезетті жеткізуге тырысатын. Екінші дүниежүзілік соғыс кезінде Ленинградты қорғауға қатысып, соғыстан кейін Қазақстанға оралып, 1948 жылы Алматы көркемсурет училищесін тәмамдады. Ізденімпаз ұстаз ретінде кейін еліміздегі көркемөнер саласындағы білім беру үрдісінің қалыптасуына ықпал етті. Almaty Museum of Arts қорында сақталған «Қазақ мадоннасы» картинасында Әжиев ана мен бала бейнесі сынды мәңгілік мотивті қайта тірілтеді. Акварель мен жарықты шебер пайдалану арқылы ол бұл таныс образды мейірім мен тыныштыққа толы терең тебіреніс тудыратын кеңістікке айналдырады. Ал «Қазақша күрес» туындысында керісінше, дене қозғалысының ырғағы мен қарқыны асқан дәлдікпен суреттеліп, палуандар иық тірестіре белдесетін ұлттық спорттың шиеленісті сәті көрініс табады. Әжиев адам денесінің екпінді қозғалысын, қарсыласын жеңуге жетелеген жігер мен сол сәтті тағатсыздана күтіп, тынысын ішіне тартқан қауымды дәл береді.