1943 ж.т., Нижнеудинск, Иркутск облысы, Ресей

(1943, Нижнеудинск – бүгінгі таңда Алматыда тұрып, шығармашылықпен айналысады) Қазақстанның заманауи өнер кеңістігінің маңызды өкілі Георгий Трякин-Бухаров 1960 жылдардан бері Алматыда тұрып, қаланың баламалы өнер қауымдастығына белсене араласты. Мәскеу мен Алматыдағы өнер оқу орындарында қысқа мерзімдік курстарға қатысқанына қарамастан, оның өзіндік жолмен қалыптасқан тәжірибесі мен эксперименттік тәсілі Дадаизм, Арте Повера бағыттарына және посткеңестік өмір шындығына негізделген. Суретші көпшілік қоқысқа теңейтін материалдарды, кішкентай ойыншықтардан бастап, үлкен жиһаздарға дейін бәрін өз жұмыстарында қолданады. Бұл – оның жеке шығармашылық стратегиясы, яғни материалдарды қайта өңдеу арқылы жаңа мағына береді. Осылайша ол «қажетсіз» дүниелерге үн қосатын өзіндік архив жасайды. Оның туындылары тозу мен тұрақсыздық эстетикасын қабылдай отырып, посткеңестік күйзелістегі күн көру мен оған бейімделудің тарихын баяндайды. Мұнда қоқыс жад метафорасы әрі жаңа болмыстың құралы ретінде көрініс табады. «Қонақтар» көрмесінде ұсынылған «Тепе-теңдік» атты мүсіні үшін ол домбыра, скрипка, барабан сияқты музыкалық аспаптардың бөлшектерін біріктіріп, адам пішінін жасайды. Сынық аспаптардан құралып, тепе-теңдікті ұстап тұрған мүсін өңірдің музыкалық мұрасын ойнақы түрде еске салып қана қоймай, суретшінің табылған нысандар арқылы өзгерісті зерттеуге деген қызығушылығын да көрсетеді.