Самара, СССР 1952-2002 Алматы, Қазақстан

(1952, Самара – 2002, Алматы) 1980 жылдардың соңында Алматының өнер сахнасында суретші, перформер және аңыз жаратушы боп танылған. Сергей Маслов құлдыраған Кеңес Одағы мен құрылып жатқан жаңа мемлекеттің беймәлім болашағы арасындағы қайшылықтарды бойына сіңірген тұлға ретінде көрінді. Ол «Түнгі трамвай» атты бейресми суретшілер тобын құрғандардың бірі болды. Бұл топ Кеңес Үкіметіндегі тоқырауға қарсы тұру мен одан қашудың құралы ретінде шығыс мистицизмі мен сюрреализмге жүгінген. 1990 жылдары Маслов посткеңестік Алматыдағы тәжірибелік мәдениеттің орталығына айналған тәуелсіз «Вояджер» галереясында түнгі күзетші болып жұмыс істей жүріп, оның бейресми жетекшісіне айналды. Суретші ирония, эротика және абсурдқа толы баяндауды өзара астастырған өзгеше ғарышнама қалыптастырды. Ол кескіндеме, бейне, перформанс пен мәтін секілді түрлі формада жұмыс істей жүріп, дала мифологиясын ғылыми фантастикамен сабақтастырып, ойдан шығарылған тұлғалар арқылы қайта елестетті. 2002 жылы жасаған «Байқоңыр-2» атты инсталляциясында Маслов киіз үйді шын мәнінде жасырынған ғарыш кемесі ретінде қарастырады. Аталған туынды қазір Almaty Museum of Arts коллекциясында ұсынылып отыр. «Қонақтар» көрмесіне енген 1982 жылы салынған «Соңғы кешкі ас» атты картинасы әрі танымал інжілдік салттарға, әрі кеңес дәуіріндегі дастарқан басында бас қосу мәдениетіне сілтеме жасай отырып, өтпелі кезеңдегі қауымдастықты бейнелейді. Оның мұрасы бүгінде Орталық Азиядағы заманауи өнерінің өзегі саналады.