Инкорейское ауылы, Еврей автономиялық облысы 1935-1992 Ақтөбе, Қазақстан

(1935, Ин-Корейское – 1992, Ақтөбе) Борис Пак – 1960-1980 жылдар аралығында бой көрсеткен Қазақстан графика өнерінің «алтын буынының» көрнекті өкілдерінің бірі. Бұл буын қатарында Мактум Қисамедин мен Исатай Исабаев та бар, олардың да туындылары «Қонақтар» көрмесіне енген. Алғашында геолог мамандығын меңгерген Пак кейіннен Ленинградтағы Репин атындағы көркемсурет институтында гравюра мамандығы бойынша білім алып (1966), саналы ғұмырын өнерге арнады. Ол кітап иллюстрациясында ерекше шеберлігімен танылды. Әсіресе, Абайдың «Қара сөздерін» (1983) безендіруі және өзінің тамырына жақын «Кәріс халық ертегілеріне» (1974) жасаған иллюстрациялары ерекше бағаланды. Сонымен қатар, ол қазақ, кәріс, Батыс Еуропа эпостары мен голландиялық М. К. Эшердің графикаларынан шабыт алды. Пак Алматыдағы Гоголь атындағы көркемсурет училищесінде графика пәнінен дәріс берді және монументал өнер саласында да еңбек етті. Оның авторлығымен жасалған Алматы қаласындағы «Арасан» моншасының керамикалық рельефтері бүгінге дейін сақталып тұр. Борис Пак әлеуметтік реализмнің қатаң догмаларынан тыс шығып, еңбек пен тұрмысты нәзік әрі үйлесімді бейнелеуге ұмтылды. «Талтүс» атты литографиясы осының тамаша мысалы бола алады. Онда отбасы мүшелерінің жүзім теріп, ас әзірлеп жатқан сәті бейнеленген. Шебердің аса мұқият әрі нәзік қолтаңбасымен салынған бұл туынды дәстүрлі қазақ тіршілігінің үйлесімін дәл жеткізеді.