Лебяжі ауылы, Киров ауданы 1930-1982 Алматы, Қазақстан

(1930, Лебяжье — 1982, Алматы) Евгений Сидоркиннің бейнелеу тілі 1958 жылы жарық көрген, талай үйдің төрінен табылған «Қазақ ертегілері» жинағына арнап салған иллюстрациялары арқылы қазақтың мәдени жадына мәңгіге сіңді. Осы жинаққа Евгений Сидоркиннің бүгінде «Қонақтар» көрмесінде ұсынылып отырған, қанық бояуымен көз тартар «Көңілді алдамшылар » атты литографиялар сериясы да енген. Аталған жұмыста Орталық Азия ауыз әдебиетінде кездесетін, бойына ақыл-парасат сіңірген, ұтқыр әзілмен билікті әжуалап, шындықты айтатын Алдар Көсе мен өзге де күлдіргі мифологиялық кейіпкерлер бейнеленген. Сидоркин Ресейде дүниеге келіп, Қазан, Рига және Санкт-Петербургтегі И. Репин атындағы институтта оқыды. Репинде оқып жүргенде болашақ жары әрі шығармашылық серігіне айналған қазақ суретшісі Гүлфайрус Ысмайыловамен танысады. 1957 жылы екеуі Алматыға қоныс аударып, содан бастап оның шығармашылығы жергілікті мәдени мұрамен үндестікте дамыды. «Қонақтар» көрмесінде суретшінің 1964 жылғы «Сәкен Сейфуллинді оқи отырып» атты топтамасы да қойылған. Бұл туындыларда сталиндік қуғын-сүргін кезінде өмірі үзілген күрескер ақынның мұрасы модернистік бейнелеу тілі арқылы қайта ой елегінен өткізіледі. Графикадан бастап қоғамдық өнерге дейінгі ауқымды кеңістікті қамтитын Сидоркиннің шығармашылығы этнографиялық зерттеу, фольклор және көркемдік жаңашылдықты ұштастыра білді. Соның жарқын мысалы – бұрынғы «Целинный» кинотеатрына арнап салған сграффито қабырға муралы.