Талдықорған, Қазақстан 1936-2007 Алматы, Қазақстан

(1936, Талдықорған – 2007, Алматы) Исатай Исабаев – ұлттық эпос пен поэзияны бейнелеу арқылы қазақ әдебиетіне көркем келбет сыйлаған график-суретші. Мәскеу полиграфия институтының түлегі, ол – ХХ ғасырдың 60-жылдары Хрущёв жылымығы кезеңінде қалыптасып, жергілікті болмысқа негізделген жаңа көркем тіл қалыптастыру жолындағы ізденістері арқылы өнерге тың леп әкелген суретшілер буынының өкілі. Оқуын аяқтаған соң, Исатай Исабаев «Жазушы» баспасында шығармашылық редактор болып жұмыс істеді. Ол шығармашылық жолында Мұхтар Әуезов және Ілияс Жансүгіров сынды алыптардың туындыларын қоса алғанда, жүзден астам кітапқа иллюстрация жасап, қазақ халқының дүниетанымын сурет арқылы өрнектеді. Кеңестік жүйеде формамен еркін жұмыс істеуге ішінара мүмкіндік берілген санаулы саланың бірі кітап графикасы еді. Дәл осы кеңістікте Исабаев ырғақ пен ою-өрнекке негізделген өзіндік дара стилін қалыптастырды. «Қонақтар» көрмесінде ұсынылған «Еңбек» және «Мереке» аталатын (Қазақ ұлттық эпосынан) туындыларында Исабаев қоғам өмірін құдды тоқылған кестедей нығыз өрнектесе, «Алтыбақан» картинасында жастар тербеле ән айтып, сыр бөлісіп, жақындаса түсетін дәстүрлі танысу ғұрпын бейнелейді. «Батырдың дүниеге келуі» атты шығарма ұл баланың, болашақ ердің өмірге келуіне орай жасалатын салт-дәстүрді бейнелейді. Туынды қазақ қоғамындағы ерлік пен тектілікке негізделген мәдени ұстанымдарды көрсетеді.