1970 ж.т., Алматы

(1970, Алматы – бүгінгі таңда Алматыда тұрып, шығармашылықпен айналысады) Орталық Азияның заманауи өнеріндегі елеулі тұлғалардың бірі Сәуле Сүлейменова ұжымдық жад пен қазақ болмысының сан қатпарлы табиғатын зерттейді. Қазақ мемлекеттік сәулет құрылыс академиясының түлегі ретінде ол граттография, фотосуретке салынған кескіндеме, пластик қалдықтармен жұмыс істеу сынды түрлі техникаларды қолданады, көбіне өзіне тән целлофан бетіне сурет салу әдісін еркін пайдаланады. Сондай-ақ оның шығармашылығында архивтік зерттеулер мен ұрпақтар сабақтастығын көрсететін отбасылық фотоқорлар да жиі қолданылады. Сүлейменова қоғамдық кеңістіктерге арналған туындылар да жасап, Қазақстан тарихындағы аса елене қоймаған немесе көмескі қалған оқиғаларды жарыққа шығаруға тырысады. Оның «Қазақ хроникасы» атты сериясынан алынған «Бата» атты жұмысы осы көзқарастың жарқын мысалы бола алады. Аталған туындыда суретші архивтік және жеке фотосуреттерді қайта түсіріп, солардың бетіне кескіндеме жасайды. Шығармада Орталық Азияның қонақжайлық пен рухани қорғаныштың символындай көне ғұрпы «бата беру» рәсімі бейнеленген. Ең қызығы, бұл көрініс Берлин қабырғасы суретінің үстіне орналастырылған. Осылайша, киелі дәстүр мен урбанистік модерн арасында диалог орнап, бір-бірінен алшақ көрінетін кеңістіктер мен контекстілер бүгінгі жаһандық саяхат пен электронды байланыстар арқылы өзара жақындаса түседі. Сурет көрерменге жанашырлық пен ынтымақтастық туралы маңызды сұрақтар қояды.